أسوأ حاجة ممكن تعملها انك تكتب Code يشتغل “وخلاص” 😒
في عالم البرمجة، ناس كتير بتقع في فخ التركيز على إن الكود “يشتغل وشكرًا” زي ما بيقولوا “لو شغال ماتلعبش فيه”، من غير ما يهتموا بالشكل أو التنسيق. وده ممكن يبان عادي في الأول، بس لما المشروع يكبر أو حد تاني يمسكه، هتبدأ المشاكل تظهر.
خليني أشرحلك ليه التركيز على نظافة وتنسيق الكود حاجة مهمة جدًا..
1. سهولة الفهم والتطوير
لما تكتب كود منسق ونظيف، بتسهل على نفسك وعلى أي حد يشتغل معاك أو ييجي بعدك إنه يفهم الكود بسرعة. الكود اللي مكتوب بشكل عشوائي بياخد وقت أطول للفهم، وده معناه تأخير في حل المشاكل أو إضافة مميزات جديدة.
2. تقليل الأخطاء
الكود النظيف بيقلل احتمالية وجود Bugs.
ليه؟ لأنك لما تكتب كود واضح ومنظم، بتبقى الأخطاء واضحة وسهل اكتشافها. على العكس، الكود العشوائي بيخلي الأخطاء مدفونة وسط التفاصيل.
3. العمل الجماعي
في فريق البرمجة، الكود مش بتاعك لوحدك، الكود بتاع الفريق كله. فـ لو كل واحد كتب بطريقته من غير اهتمام بالنظافة والتنسيق، الكود هيبقى عامل زي لغز معقد. لازم تلتزم بمعايير موحدة للكود عشان الفريق كله يقدر يتعامل معاه بسهولة.
4. الصيانة المستقبلية
كل ما المشروع يكبر، كل ما هتحتاج تعمل تغييرات وصيانة أكتر. الكود النظيف بيوفر عليك وقت ومجهود كبير في المستقبل، لأنه بيكون سهل تعديله أو تحديثه.
“صدقني .. من كتر التسهيل على نفسك المستقبلية ، هتيجي في المستقبل تقول الحمدلله اني عملت الـ Function كدا وخدت فيها وقت اكتر”
– إزاي تخلي كودك نظيف ومنظم؟
1. التسمية الواضحة: استخدم أسماء تعبر عن وظيفتها بوضوح تام.
“مش هقولك علشان الفريق بس ، ده انت دلوقتي غير انت السنة الجاية”
2. تعليقات معتدلة: اكتب تعليقات تشرح النقاط المعقدة بس، وما تكتبش حاجات بديهية. “اوعى بديهية ، التعليقات كلها هتفقد الأهمية”
3. تجنب التكرار: لو في كود متكرر، حطّه في Function أو Class.
4. تنسيق الكود: استخدم Tools زي Prettier أو ESLint عشان تظبط التنسيق.
“أنصحك زي ما نصحني Osama Elzero ، انك قبل ما تبدأ تستخدم أي أدوات تنسيق للكود – كودك يكون منظم بـ إيدك الأول”
5. اتّبع معايير الكود: التزم بالـ Best Practices المعروفة في اللغة اللي بتشتغل بيها.
كتابة كود نظيف ومنظم مش رفاهية، دي مهارة أساسية لأي مبرمج محترف. لما تركز على النظافة والتنسيق، بتضمن إن شغلك هيعيش أطول وهيكون قابل للتطوير بسهولة. خليك فاكر دايمًا إن الكود مش بس عشان يشتغل، الكود كمان عشان يتفهم ويتطور.
فيه بوست عن طريقة كتابة الـ Best Practices المعروفة أو الـ Naming Conventions في لغات البرمجة بـشكل عام😉
