عارف الإحساس اللي بتحسه أول ما تبدأ تتعلم حاجة جديدة؟ 🧩
بتبقى تايه، مش فاهم أي حاجة، وكل سطر كود تحسه طلاسم قدامك، بتسأل نفسك: “هو أنا ليه بعمل في نفسي كدا؟” 🤦♂️
ده كان إحساسي أول مرة دخلت على JavaScript .. الدنيا كانت معقدة، وأي bug كنت بحس إنه خلاص دي آخر مرة هـ كود فيها، بس في نفس الوقت كنت بتعلم كل يوم حاجة جديدة.
وواحدة واحدة… الدنيا بدأت توضح.
اتعلمت أكون صبور مع نفسي، وأفهم إن الـ “bugs” مش نهاية العالم، بالعكس.. دي أكتر حاجة بتعلّمني.
طب دلوقتي؟
بعد ما JavaScript بقت أكتر لغة متقنها بقيت أشتغل بيها بـ React.js و Node.js و Next.js و Three.js و TypeScript، وعملت مشاريع كاملة بـ MongoDB و Express.js، وبقيت عارف إن كل مرة كنت بقف فيها قدام مشكلة، كنت بتقدم خطوة لـ قدام حتى لو محستهاش ساعتها.
نصيحتي لأي حد لسه بيبدأ رحلته (الأكثر متعة):
– ابدأ بـ حاجة صغيرة، حتى لو مجرد “To-do list”، ما تستصغرش أي حاجة.
– اتعامل مع الـ bugs كأنها تحدي مش عائق، لإنها هتعلّمك أكتر من أي كورس.
– شارك اللي بتتعلمه، حتى لو حاسس إنه بسيط، متستناش تبقى perfect عشان تنشر شغلك. الـ feedback بيفرق جدًا.
– استمتع بالرحلة، لأن التعلم مش محطة هتوصلها وسلام، ده طريق بتمشيه كل يوم. (عمرك ماهتبطل تتعلم في المجال ده ، إلا لو ناوي على career shift)
النهاردة، ببص على أول مشروع ليّا وبضحك.. مش علشان كان وحش، بس علشان عرفت قد إيه الرحلة دي كانت مهمة. كل error، كل bug، وكل سطر كود اتكتب واتمسح كان جزء من اللي وصلتله دلوقتي.
فخليك فاكر دايمًا إن “التطور بيبدأ بخطوة صغيرة.. وبجّاية كبيرة 😅”
