العلاقة بين الـ Designer والـ Developer .. شراكة ولا منافسة؟ 🤔
سواء كنت Designer بتشتغل على تحويل أفكار لحاجات شكلها حلو وجذابة، أو Developer بتحول الحاجات دي لكود شغال، أكيد عديت بمواقف حسستك إن الشغل مع التيم التاني مش سهل.
لكن الحقيقة إن الديزاين والكودينج بيكملوا بعض.
المنتج الناجح مش هيطلع كامل إلا لما الاتنين يشتغلوا مع بعض.
ليه العلاقة أوقات بتكون معقدة؟
– الـ Designers بيشوفوا الدنيا بالجمال: ألوان، تفاصيل، أنيميشنز، وكل حاجة بتخلي المنتج شكله مريح وجذاب.
– الـ Developers بيركزوا على الكود: الأداء، سرعة التحميل، وإن الحاجة تشتغل بكفاءة.
الاختلاف ده طبيعي جدًا، بس لو ركزنا شوية هنلاقي إن الهدف واحد..
(نقدم أحسن تجربة للمستخدم)
طب فين المشاكل؟
“التصميم ده صعب يتنفذ”
الديزاينر ساعات بيطلع بتصميم حلو جدًا، بس بيكون بعيد عن الإمكانيات التقنية أو مكلّف في التنفيذ.
“الكودينج بوّظ التصميم”
الديفيلوبر ساعات بيضطر يغير حاجات في التصميم عشان يخلص أسرع أو بسبب قيود في الإمكانيات، وده بيأثر على الشكل النهائي.
“التواصل ضعيف”
لما كل واحد شغال لوحده، الطبيعي يحصل سوء تفاهم، وكل واحد يبقى شايف الموضوع من زاويته بس.
إزاي العلاقة تبقى شراكة بجد؟
– ابدأوا مع بعض من الأول:
اتكلموا في كل حاجة من البداية. خلي الديفيلوبر يحضر جلسات التصميم، والديزاينر يعرف حدود الإمكانيات التقنية من الأول.
– اشتغلوا بأدوات واحدة:
استخدموا حاجات زي Figma أو Zeplin عشان التفاصيل تبقى واضحة ومفيش حد يضيع وقته. كمان، الـ Design Systems بتوفر وقت كبير وبتمنع اختلافات كتير.
– افهموا لغة بعض:
لو انت ديزاينر: اتعلم شوية عن الكود، حاجات بسيطة زي Flexbox و CSS Grid هتساعدك تفهم إزاي الحاجات بتترتب بشكل صح على الصفحة وتديك تحكم أكتر في التصميم.
🔗 https://css-tricks.com/snippets/css/a-guide-to-flexbox/
🔗 https://css-tricks.com/css-grid-layout-guide/
لو انت ديفيلوبر: اعرف أساسيات التصميم، زي التباعد وتناسق الألوان، هتساعدك تحافظ على روح التصميم.
🔗 https://m3.material.io/styles
🔗 https://m3.material.io/foundations/layout/understanding-layout/overview
– خلي الفيدباك يبقى واضح وبناء:
لو حاجة مش مظبوطة، قول السبب واقترح حل. الكلام الإيجابي بيبني ثقة بين الفريقين.
أهم نصيحة: فكّر زي المستخدم.
المستخدم مش فارق معاه مين عمل إيه. هو عايز منتج شكله حلو، شغال بسرعة، وسهل في الاستخدام. لو فكرنا كده، هنلاقي إن الخلافات بتقل، والتعاون بقى أحسن بكتير.
العلاقة بين الديزاينرز والديفيلوبرز مش لازم تكون حرب.
لما نشتغل كفريق واحد وبنفس الهدف، هنطلع حاجات مبهرة. ❤️ 💯
